Futbolista Matthew Maduro lo forma parti di e organisacion di futbol mas grandi na Miami

Recientemente e hoben futbolista di Nacional y tambe Team Dreyer, Matthew Maduro a keda selecta pa Doral Soccer Club na Miami-Dade pa forma parti di nan organisacion como e asina yama ‘guest player’. Despues cu varios biaha Matthew a atende e tryout nan na dicho organisacion, despues di 2 aña, Doral Soccer Club a dicidi di acepta Matthew como un hungador di nan organisacion no obstante cu e no ta residencia na Merca. Pa e hoben Maduro mas cu claro esaki ta un bunita oportunidad pa e sigui desaroya su futbol y crece bira mas grandi den e deporte rey. Fin di luna awor Matthew lo tin su prome compromiso cu Doral Soccer Club ora nan hunga cu un torneo na Orlando. 

Den un combersacion sosteni cu coach Dreyer Bracho e la conta nos cu Matthew ta un tremendo futbolista cu calidad natural, cu bon tecnica y ta hunga medio campo ofensivo aunke e por haci su tareanan defensivo tambe. Actualmente e ta milita den e ekipo di U11. Por ultimo Dreyer ta mira cu e adkision di Matthew na Doral Soccer Club, un porta por habri pa varios otro hungadornan di Aruba por haya e oportunidad pa haci tryout nan na dicho club. E clubnan na Merca hopi biaha ta interesa den futbolistanan den e area di Caribe. 

 

Doral Soccer Club ta partner di e ekipo profesional di futbol Inter Miami di cual propetario ta e conocido ex-futbolista David Beckham di Inglatera cu a hunga pa entre otro Manchester United, Real Madrid y AC Milan. 

 

Di aki banda nos di 297sports kier a felicita Matthew Maduro cu e logro aki. Hopi exito den e proximo torneo di Disney na Orlando

 

Keda pendiente pa un entrevista realisa cu Dreyer Bracho riba e logro di Matthew Maduro