366
COA ta cuminsa prepara pa e siguiente ciclo Olimpico. Manera ta conoci, Comite Olimpico Arubano (COA) ta participa den weganan di e ciclo Olimpico, cu den Aruba su caso ta nifica participacion den weganan den e region Panamericano y Sudamericano. Pa e participacion aki, claramente tin atletanan ta prepara hopi duro pa por competi na e nivel mas halto, ademas di tin nan entrenadornan cu ta percura pa un bon nivel di entrenamento y guia. Banda di e grupo di atleta y entrenador, bo tin e ekipo tecnico di COA cu tambe ta forma parti di e grupo aki, dunando guia general y observando e proceso pa asina yuda pa tin e nivel mas halto posibel.
Igual di importante cu tur e aspectonan tecnico menciona, tin cu hasi hopi trabou di preparacion den cuadro di logistica y administracion, pues registra na e weganan, cumpli cu tur e procesonan ademas di tin un comunicacion estrecho cu e comision di organisacion di e weganan, pa asina regla tur cos pa e delegacion di Aruba por participa exitosamente. Den e rol clave aki, tur delegacion tin nan “CHEF DE MISSION”, cu ta fungi como e lider y vocero di e grupo den e weganan.
E rol di un Chef de Mission (CDM) ta cuminsa varios luna antes di un wega, como hopi trabou di preparacion ta bay den esaki, cuminsando na ricibi tur informacion di e organisacion di e wega, prepara e parti financierio/presupuesto, acumula tur informacion necesario di e federacion pa registracion, regla e partinan di proceso di COA y mucho mas. Ademas di esaki, claramente lo mester bay participa na e weganan, cual kiermen cu mester bay na e cede di e competencianan, y ta e prome pa yega, asina prepara tur cos pa e delegacion cu ta yega pa competi, y alabes ta e ultimo pa bay, como mester percura pa finalisa tur e procesonan necesario di salida. Unabes e trabou caba na e cede di e weganan, ta bolbe Aruba pa conclui cu e ultimo paso, entrega tur documento necesario y finalisa e parti financiero/budget.
Como CDM, bo lo hasi conoci cu un mundo completamente unico, unda bo ta forma parti di organiscion di e weganan grandi aki, cu por yega hasta na un participacion di mas di 7000 atleta, manera tabata e caso na ultimo weganan Panamericano di Santiago2023.
Nos ta buscando individuonan interesa den forma parti di e experiencia unico aki! Si bo ta interesa, tin 2 cos importante cu bo persona lo mester hasi. E prome ta manda bo CV via email info@olympicaruba.com y acudi na e reunion informativo di dia 29 di Mei. Si ta desea mas informacion, tira un bista riba e flyer, unda tur detaye ta poni, incluyendo un number unda por busca mas informacion.