FAMILY RUNNERS lo dedica e Ronde van Aruba 2023 na Buchi Tico(dfm) y tur esnan cu a perde e bataya contra e malesa cancer

Den tur Ronde van Aruba bo ta tende storianan impactante y sigur emocionante, e mayoria door di participantenan cu lo core e 72km di RVA pa un bon causa. Awe na vispera di e Ronde van Aruba nos a encontra cu un famia cu lo dedica e Ronde na un ser keri cu a bay laga nos siman pasa.

Esaki ta e storia di Family Runners

Despues di un periodo largo coriendo y participando na diferente evento di coremento, Jamil a dicidi na 2015 pa participa na su prome marathon. For di e tempo ey caba e meta tras di esaki tawata pa motiva personanan cu tawata den lucha contra e malesa teribel di cancer. E careda ey en cuestion el a core y a dedica esaki na un acto-prima di dje cu tawata batayando contra cancer. Poco tempo despues Jamil su primo, Giandre (omo di e persona cu tawata bataya contra cancer) a dicidi di join e deporte di coremento y a participa na varios careda incluyendo e famoso 1/2 marathon y tambe RVA 2016.

Lamentablemente nan familiar a perde e lucha contra cancer y a fayece. Eynan ta caminda Giovanni cu ta e tata a dicidi di join e deporte aki. Na prome instante cu canamento pa motibo cu el a yega di kibra tur dos rudia y a pensa cu nunca e lo por bay core y sigur no distancia largo. Asina tambe Giovanni a participa na tres 1/2 marathon y diferente otro evento di coremento na Aruba.          

For di aña pasa a planea pa core RVA entre famia y asina a acerca Ricardo pa join nan. Esaki ta Ricardo su prome biaha participando.

For di 2020 tawata tin un otro familiar cu tawata batayando contra cancer y nan a dedica diferente careda na dje. E ultimo medaya di ½ marathon, Giovanni a regala e persona aki. Lamentablemente siman pasa na vispera di RVA 2023 nan familiar Buchi Tico a bin ta perde e bataya, cu ta algo hopi duro pa nan.

E RVA aki ta uno hopi special y FAMILY RUNNERS (no tur cu mesun speed) ta bay duna lo maximo di nan. Nan ta dedica e careda aki na nan familiares y tur persona cu a perde e bataya contra cancer, pero tambe na tur esnan cu ta batayando contra e malesa aki, incluyendo un otro ser keri di nan.  Nan quote ta bisa tur cos:

Supporting the fighters

Admiring the survivors

Honoring the taken

And never, ever giving up

HOPE

FAMILY RUNNERS ta consisti di:

1. Giandre Boekhoudt
2. Ricardo Zievinger
3. Giovanni Boekhoudt
4. Jamil Werleman