Den un Frans Figaroa bon yena cu fanatico a tuma lugar e gran final di futbol femino den e categoria U17 entre Britannia y Estrella. Nos a mira un bon bataya entre e dos mihor ekiponan den e Campeonato actual. Estrella cu un leve ventaha a crea algun bon chens pa anota e gol di bay ariba. Di otro banda, Britannia tambe a forza bon na algun occasion pero sin mucho peliger pa e porteria di Estrella. Sinembargo e delantero Morisson ta anota e gol di bay ariba1 – 0 ora e ta haya su so dilanti e portero Henriquez. Asina halftime ta bay aden cu Estrella den ventaha minimo..
Den e di dos tempo Britannia ta sakli feroz y apenas algun minuut hugando for di un tiro di skina e defensor Zianne Loepstok ta cabeza pa e empate 1 – 1. Despues di e gol e wega ta bira uno fisico y candela unda e referee femenino mester a parti varios carchi y hala atencion di e hungadornan. Segun ne wega ta transcuri, Estrella a mira su chens di anota gol. Aki e alero Sundari van der Linden ta los un tiro duro y aki e bala ta bons dos biaha den e lata di gol y drenta gol aunke e portero e gara e bala. E presenta dos scenario unda Estrella ta celebra nan gol di bay ariba mientras Britannia ta protesta fuertemente na e referee cu e bala no a crusa e linea di gol. Aki e referee tin e ultimo palabra y a tuma su desicion y ta indica gol. Asina Estrella por a celebra e ventaha di 2 – 1 y e titulo di campeon.
Na final Minister Endy Croes den presencia di miembronan di AVB a haci entrega di e Copa y medayanan na e dos ekiponan.
