1.1K
Pa hopi aña caba ta conoci cu tin varios Arubiano ta biaha pa Hulanda unda nan ta participa den e famoso caminata Vierdaagse teni na e ciudad di Nijmegen, Hulanda. Un evento di 4 dia cu ta conta cu un participacion di mas cu 50.000 participante rond mundo kendenan lo cana 30km, 40km of 50km pa dia na pia.
Un grupo cu pa hopi aña caba ta cana esaki ta nos Douaneronan cu e aña aki atrobe a logra cana esaki. E douaneronan cu a participa ta Jerrold Tromp(5 biaha), Gio Davelaar(15 biaha), Marlon Ruis(17 biaha) y Oliver Peter Wever(7 biaha). E biaha aki e douaneronan a haya un compañero aserca cu ta Alberto Tromp cu ta traha na WEB Aruba NV, kende a cana e 4-daagse pa di 5 biaha. Mester bisa tambe cu lamentablemente Oliver Peter Wever a sufri un lesion na rudia unda e no por completa e 4-daagse. Algun dia atras, e douaneronan a bishita Cas di Aruba na Hulanda y a encontra cu Minister Plenipotenciario, mr. Juan Ady Thijsen unda e combersa riba nan participacion.
Un palabra di pabien na Jerrold, Gio, Oliver, Alberto y Marlon cu nan recorido den e Vierdaagse di Nijmegen. Manera custumber awor ta descansa pa un djis inscribi y prepara pa otro anja atrobe cu Dios su Poder
