Atleta di MMA, Jeandrick Croes a elabora riba su combate den e APFC 22 unda ela triunfa na New Mexico y su combate den VXFC contra di Gerrick Bontekoe.
Durante un conferencia di prensa na Double Down Sports Bar & Grill, e atleta di MMA Jeandrick Croes hunto cu su tata Endy Croes a elabora riba e pelea di Jeandrick den luna di maart unda cu e pugil di Aruba a sali victorioso den e magno evento APFC.
Pa Jeandrick un oportunidad unico a presenta ora e promotornan a mira su pelea y asina na januari un yamada a cambia tur cos. Mas cu claro pa su persona cu desde 2017 a inicia den e deporte di MMA entrenando na Milliard Academy, tabata un chens unico pa briya den exterior den un evento renombra y asina tur su preparacion a cuminsa pa e combate na New Mexico.
PREPARACION Y COMBATE DEN APFC
Pa loke ta e su preparacion y e combate mes, Jeandrick ta conta nos cu e experiencia obteni tabata unico, e produccion ta uno grandi y hopi profesional hinka den otro. Su entrenamento y preparacion cu henter su team a bay sublime. Segun Jeandrick e nivel di e combatenan ta bon pero e no ta nada cu nos atletanan di MMA di Aruba no por yega na dje. Nos tambe por solamente nos tin cu traha duro, uni y sera cabes hunto pa por logra cosnan grandi. Pa Jeandrick e puntonan aki lo mester pasa pa asina mas peleador di Aruba haya tipo di oportunidad nan aki. Den luna di september proximo, Jeandrick lo tin un pelea programa pa APFC.
LESION
Notable ta cu Jeandrick pa hopi tempo tabata lesiona, pero awor ta full recupera. Manera e mes a bisa cu e deporte aki tin su extra riesgo cune pero abo tin cu cuida extra pa asina cosnan bay bon. Awor e ta full recupera y ta cla pa su siguiente combate. Semper ta agradecido cu bo ta liber di lesion y haya e chens pa sigui bringa.
VXFC vs GERRICK BONTEKOE
Pa loke ta su pelea contra di Gerrick Bontekoe den e magno evento di VXFC den luna di juni proximo, Jeandrick ta conta nos cu e no mester prepara mucho paso e la caba di bringa na Merca pues awor ta djis sigui entrena mientras e ta sinti su mes cla caba. Awor elo traha riba e detayesnan y errornan chikito cometi na Merca y ahusta esakinan. Un cos si segun Jeandrick den e pelea aki Bontekoe no lo tin niun chens.
Finalisando Jeandrick a bisa; “Mino ta balota niun hende, mi ta train duro, pero un cos si, mi ta bay ranca su cabes afor dia 27 di juni. Misa cu Bontekoe lo mira e video aki, wak pa e ta ready paso e la haya su chens di papia. Dia 27 di juni wak pa bo presenta paso bo cabes ta bay wordo kita”.