487
Diadomingo atardi a tuma lugar e final di U20 den stadion di Frans Figaroa na Noord. Dilanti un publico bon anima bou ritmo di brassband e dos rivalnan aki a bataya y duna e fanaticada un futbol cu hopi movecion y un final mas DRAMATICO cu nunca. Den e ultimo 10 minuutnan di wega den e extra tempo, nos a presencia un futbol asina emocionante cu nos tabata basta anja sin mira na Aruba. Tur cos a pasa mane un “cuenta de hadas”.
Prome tempo
Den e prome tempo nos a mira un wega basta pareu. E wega a concentra pa sigur un 15 minuut den e medio campo unda tur dos ekipo a trata na tuma e reinda aki. Poco poco Dakotaa cuminsa tuma e inicitiva unda a ataka mas pero no a crea un mucho oportunidad di anota gol. E linea di defensa di Britannia no a duna mucho espacio y a marca skerpi riba e linea di delantero cu e peligroso Montsanto. Di otro banda Britannia mas bien a purba pa medio di un contra atake usando nan liherez padilanti y asina trata na sorprende e linea di defensa di Dakota cu sin duda tabata duro para. Mester bisa cu den ambos ekipo tabata falta e presicion, hopi bala malo pasa y hopi individualismo cu a stroba cu mayoria atake no tabata ser bon acaba. Halftime a bay aden 0 – 0.
Dos tempo
Den e di e dos tempo nos por a mira un bes mas e mesun patronchi cu den e prome tempo,cu tiki oportunidad di gol crea. Ambos linea defensivo tabata skerpi cu a haci cu tiki chens a ser crea pa tanto Dakota como Britannia. Dado momento e wega a ser para debi cu un banda di e lus den stadion di Frans Figaroa a cay afor pero rapidamento esaki a wordo resolvi. Asina mes despues cu a reanuda e wega no tabata mucho cambio cu ambos ekipo luchando pa habri e marcador. Tur cos a mustra cu nos lo haya e tironan di penalti cu mester a defini un campeon den e categoria U20. Tanto Dakota como Britannia a sigui forza pa hinka e gol di campeon pero envano. Asina e wega a keda empata 0 – 0 y mester a bay over na e extra tempo.
Den e prome mitad di e extra tempo, no mucho oportinidad a ser crea cu Dakota mas serca di e gol casi na comienso di e di dos extra tempo. Aki e bala ta pasa serca di e palo di gol y bay afor. Pero mane nan ta bisa si bo no hinka e otro banda lo probecha. Faltando un 10 minuut pa e wega teremina, sorpresivamente Britannia ta anota e 1 – 0 pa medio di e Jaime Torres despues cu e keeper di Dakota ta sali riba un hugada y laga su gol full habri. Aki e bala ta cay den pia di Torres cu no ta basila y ta pone Britannia 1 – 0 den e marcador. Aki ta caminda cu Dakota a lansa un ofensiva feroz unda Britannia a defende cu alma y cuerpo. Sinembargo un empuhe di keeper Croes ta pone Dakota haya un penalti cu nan ta tira afor unda e hungador Mackenly ta tira afor.
Pero ni dos minuut despues e delantero Terrick Montsanto di Dakota cu un bunita chalaca ta anota e 1 – 1. Esaki sin duda tabata e gol di campeonato U20. Aki Dakota a sigui pone presion buscando e gol di victoria ya cu nan sa cu bay penalti cu keeper Ziyon Croes di Britannia por bira uno peligroso(Dakota e perde e final den Division di Honor pa penalti contra Britannia cu Ziyon Croes den gol). Lo inespera ta pasa faltando 4 minuut pa e wega teremina unda e bolante di Dakota, Samy Joseph ta domina un bala den e area penal di Britannia, e ta kita e defensor for di su curpa y cu un mitad draai e ta coloca e bala den nobenta pa e 2 – 1 pa Dakota. Mas cu claro e alegria tabata grandisimo ya cu den dos minuut Dakota ta anota dos gol y asina logra e titulo campeonil den futbol U20.
Na final, AVB pa medio di su vice-presidente sra. Geeta Khemlani y presidente Randolf Lacle a haci entrega di e copanan na e capitan nan di Britannia y Dakota
