1.9K
For di e historiador deportivo Rudy Cicilia di Corsow nos ta publika un bunita ‘ reconocimento y logro di e legendario Albert ‘Ali’ Lake cu siman pasa a bay laga nos. E historiador deportivo, Cicilia a compila tur e logronan di Albert Lake den su deportenan cu e la praktika. Sin duda nos por a mira con grandi Ali Lake tabata den e deporte local y a briya den encuentronan internacional como un bon ehempel pa e hubentud principelmente e bario di Dakota.
Nos ta pone e relato di sr. Rudy Cicilia manera cu su persona a scirbi esaki.
E ta bisa asina ki;
Unu Nobo Nobo.
Un legendario delantero di Dakota Aruba i ketcher di Marlboro, ku praktiká hopi deporte.
NR. 429 ALBERT “ALI” LAKE Sr.
Ramo di deporte: Futbòl, Beisbòl, Vòlibòl, Sòftbòl, Futsal
Kategoria: Deportista i Dirigente tekniko.
Introdukshon:
Albert Lake, mihó konosí komo “Ali” a nasé dia 30 april 1960 na Aruba. El a praktiká hopi ramo di deporte, e.o. futbòl, beisbòl, vòlibòl, sòftbòl, futsal i representá Aruba internashonal tambe. Den futbòl su posishon tabata delantero. Albert ta un deportista ku a pone hopi alegria den Mundu di futbòl, komo Kampion di su bario ku S.V. Dakota. Su karera ta parti den dos kategoria, e.o. komo deportista i dirigente tekniko.
1. Karera komo deportista:
A. Futbòl:
Abert Lake a kuminsá hunga futbòl ku 9 aña den aspirant ku e ekipo di Juventud Millionarios, bou di guia di sr. Joe Brown. Despues el a hunga varios aña den e ekipo Aparicio Stars, bou di guia di dft. Rosendo Aparicio. E ekipo aki a titulá Kampion den 3 diferente divishon i ku Albert mayoria aña komo kapitan.
Den Dakota:
Na aña 1979 Albert a wordu aserka pa e legendario hungado, entrenador i konosedor di futbòl den persona di sr. Doc Williams, pa e bin militá den e ekipo S.V. Dakota, ku na e momentu ei tabatin diferente titulo di Kampion i Sup Kampion.
Albert a hunga for di 1979 te ku 1991 pa Dakota. Den retrospekto por bisa ku Albert i su kompañeronan di ekipo a sa di kumpli kabalmente ku nan tarea, mirando ku di aña 1980 pa 1983, esta 4 aña sigui nan a sali Kampion di Aruba i na mas ku un okashon invikto i 5 biaha Sup Kampion di Aruba. Pues un hazaña meritorio sin presidente. Na nivel Antiano tabatin varios bataya ku ekiponan manera SUBT, Sithoc, Undeba, Jong Holland i Real Rincon, di kual na aña 1982 nan a sali Sup Kampion di Antia. El a hunga tambe kontra diferente ekipo internashonal, e.o.: RKC Waalwijk, Selekshon Grenada, Junior di Barranquilla, Selekshon di Mexico, Selekshon di Venezuela, Leo Victor i Robin Hood di Sürnam. Na 1980 i 1985 Albert a resultá e maksimo goliadó di e kampionato i na 1980 i 1982 e tabata e hungado mas valioso di e kampionato. Komo ku Albert tabata bula hopi haltu, e tabata wordu temi pa su golnan ku kabes.
Oferta:
Albert a haña petishon ku oferta pa bai militá den ekiponan internashonal, e.o. Colombia, Brazil i Kòrsou. Pero pa motibu ku e stima Dakota, su famia i Aruba, e no a bandona Aruba.
Den Selekshon Aruba:
Den divishon hubenil Albert tabatin e honor di forma parti na dos okashon di Selekshon Nashonal di Aruba, bou di guia di e legendario futbolista profeshonal dft. Ange Perez. Na aña 1982 el a hunga ku Selekshon Aruba kontra Hungria i despues di Status Apartus, el a hunga na 1989 pa e Selekshon Aruba den e Caribbean Cup di C.F.U.
Den Selekshon Antia:
Na 1978 Albert a forma parti di e Selekshon di Antia Hulandes kontra Barbados i Sürnam pa e Copa Duvalier di Caribbean Football Union. Na augustus 1982 el a hunga pa Antia den e Weganan Centroamericano y di Caribe na Habana, Cuba.
Reforsá ekipo:
Duranta Albert su karera el a reforsá, e.o.:
– 1980 RCA kontra Feyenoord di Hulanda i despues La Fama kontra Botafogo di Brazil.
Den veterano:
Despues ku Albert a stòp ku su karera den e kampionato nashonal di A.V.B., el a bai militá den e legendario ekipo veterano F.C. Roma, kaminda el a yega di sali máksimo goliadó i hungado mas valioso di Fedeveta.
B. Beisbòl:
Albert a hunga 3 aña beisbòl tambe den Marlboro, komo ketcher estelar i outfielder, ora Chu Halabi a bai studia. Na aña 1978 el a bira Kampion di Aruba i Kampion di Antia ku Marlboro di Aruba.
C. Sòftbòl:
Albert a hunga sòftbòl tambe den Sibonne komo tersera base i shortstop, di kual tambe nan a titulá Kampion den añanan 80 i despues el a hunga den Aldo Travel, di kual mayoria hungado tabata di Marlboro.
D. Vòlibòl:
Albert a hunga for di su 10 aña di edat den tur divishon di vòlibòl i el a titulá Kampion den kasi tur divishon. Solamente den divishon mayor ku tabata konta ku e mihó hungadonan di Aruba, e no a bira Kampion.
Albert a hunga hopi aña ku Dakota PX i despues Dakota Adidas. Na final el a hunga pa Stars i tambe sali Kampion di B klasse di kampionato di vòlibòl di Aruba.
E. Futsal:
Albert a hunga futsal komo kiper den e ekipo Guinness i sali Kampion ku nan.
2. Karera komo dirigente tekniko:
Albert su karera komo dirigente tekniko a kuminsá ku Dakota LIFIDA. El a train Dakota LIFIDA Menor i Mayor i kue Kampion ku e kategorianan aki huntu ku su dos yunan Abi i Brian. El a train un di su promé ekiponan “Aparicio Stars”, kaminda e tin hopi bon rekuerdo i dor di su trajektoria, talento i konosementu amplio di futbòl, el a wordu aserka pa train otro klupnan tambe. Di besencuando Albert ta train riba su mes na Sentro Bario i Deporte Dakota. Einan e sa topa e muchanan di Dakota LIFIDA i nan sa aserke, pe siñanan taktikanan di futbòl, komo tambe loke semper tabata su spesialidat di hinka gol ku kabes.
Logronan komo deportista:
A. Futbòl
Personal:
– 1980 Hattrick kontra SCA.
– 1980 Máksimo Goliadó di Kampionato Hoofdklasse di Aruba.
– 1980 MVP di Kampionato Hoofdklasse di Aruba.
– 1982 MVP di Kampionato Hoofdklasse di Aruba.
– 1985 Máksimo Goliadó di Kampionato Hoofdklasse di Aruba.
– Máksimo Goliadó di Kampionato Fedeveta.
– MVP di Kampionato Fedeveta.
Ku ekipo:
– 1980 Kampion di Kampionato Hoofdklasse di Aruba.
– 1981 Kampion di Kampionato Hoofdklasse di Aruba.
– 1982 Kampion di Kampionato Hoofdklasse di Aruba.
– 1983 Kampion di Kampionato Hoofdklasse di Aruba.
– 1982/83 Sup Kampion di Antia ku Dakota.
– 1983 Kampion di Copa Parlamentario di Aruba.
Logronan komo dirigente tekniko:
– Kampion ku Dakota LIFIDA Menor i Mayor.
Logronan ku ekipo:
B. Beisbòl:
– 1978 Kampion di Aruba ku Marlboro.
– 1978 Kampion di Antia ku Marlboro.
Logronan ku ekipo:
C. Sòftbòl:
– Añanan 80 Kampion di kampionato di sòftbòl ku Sibonne.
Logronan ku ekipo:
D. Vòlibòl:
– Kampion den kasi tur divishon ku Dakota PX i Dakota Adidas.
– Kampion di B klasse di Kampionato di Aruba ku Stars.
Logronan ku ekipo:
E. Futsal:
– Kampion di futsal ku Guinness.
Rekonosementunan risibí:
– 2014/15 Kampionato futbòl di Aruba dedika na su persona.
– 2014 Homenahe di S.V. Dakota.
– Baluarte rekonose pa “Dakota di Seis”.
Cu Ali Lake Sosega na Paz den Brfasa di Senjor Dios
Majan diabierna lo tin oportunidad pa duna condolencia na e famia, amigo y conocirnan esaki ta Centro di Bario Dakota cuminsando for di 6.30 di atardi. Diasabra lo tin e entiero na Misa Fatima na Dakota.
