COA y su partnernan IBISA Aruba y Aruba Bank a celebra e Dia Olimpico. Tur aña riba e fecha 23 di juni, Movimento Olimpico rond mundo ta celebra Dia Olimpico. Sinembargo Comite Olimpico Arubano a celebra esaki 1 siman prome mirando e compromiso pa cu e Weganan Centro Americano y del Caribe unda Aruba lo participa cu un delegacion grandi na El Salvador y lo mester biaha diaranson awor.
Dia OlimpicoTabata riba 23 di juni, di aña 1894, cu na e Universidad di Sorbonne, Paris, Francia, un grupo di persona, encabesa pa e filosofo, historiado y gran idealista, Baron Pierre de Coubertin a dicidi di re-activa e Weganan Olimpico. Comite Olimpico Nacional y nan miembronan Olimpico rond mundo ta organisa celebracionnan special awe riba e fecha 23 di juni pa conmemora “Olympic Day”. Durante e 127 aniversario aki tambe lo wak Comitenan Olimpico Nacional y Federacionnan Internacional di cinco continente hunto cu atletanan Olimpico, yama “Olympians” encurasha tanto hoben como adulto pa ta envolvi den actividadnan deportivo, cultural y educativo. Lo enfatisa riba e lugar cu deporte tin den sociedad y con deporte por yuda comunidad yega na tolerancia social pa asina alcansa bon boluntad. E tres pilarnan di Dia Olimpico ta move, siña y descubri. Uzando e mensahenan aki organisacionnan awe ta promove e beneficionan di ehercicio fisico y inspira hende pa bira activo y yuda nan conoce deportenan nobo via e idealnan Olimpico, sin importa cu habilidadnan of background.
Awe diasabra mainta dilanti di e oficina nobo di Comite Olimpico Arubano, alrededor di 750 alumno di scol a bin celebra e dia festivo aki cu e famoso IBISA Kids and Youth Run cu sin duda a haya un acohida abrumador. Hunto cu nan mayornan, maestronan di scol, famia, amigo y conocirnan, e muchanan a disfruta di un dushi mainta deportivo den e caya di Vondellaan cu tabata parcialmente sera. Na final tabata tin refreshment pa tur mucha y nan a haya un certificado di participacion. Esnan cu a cay den premiacion a ricibi nan medaya for di nos dos atletanan elite di BMX y Taekwondo esta Shanayah Howell y Jaimar Chirinos. Tambe por a saca potret na e renchinan Olimpico y e famoso torch di e Weganan Olimpico di Tokyo. Den un solo palabra un mainta deportivo super exitoso.Aruba y nos muchanan sin duda tabata contento di por forma parti di e celebracion mundial di e Olympic Day.
