Rondona pa su companeronan, staf tecnico y dirigentenan di e seleccion di Aruba, futbolista femenino Michaela Netto a haya su merecido despedida for di Arubaanse Voetbalbond. Na Urataka Center tur e hende a bini hunto y den un ambiente ameno a tuma despedida di Michaela cu den e dianan benidero lo sigui cu su scol y futbol na Hulanda unda e la wordo acepta pa uni cu e ekipo profesional Jong Utrecht.
Michaela Netto sigur un pieza clave den e dos seleccionnan hubenil di Aruba cu a logra e titulo di campeon di CFU na Republica Dominicana na 2021 y e titulo di runner-up den e campeonarto di CONCACAF na Tampa, Florida na 2022.
Pa loke ta e futbol Michaela semper tabata un ehempel pa su companeronan, un lider riba tereno y masha keri serca tur.
A otorga na Michaela diferente regalo como recuerdo pa asina e por keda corda e seleccion di Aruba.
