E evento tan anticipa, Ride for the Roses Aruba 2024, a uni nos comunidad den un dia yena di actividad pa sostene esnan afecta pa cancer.
Patrocina pa Aruba Bank y organisa pa Stichting Aruba One Happy Bike Island, e evento anual aki a uni participantenan cu a scohe pa core bicicleta, core, cana y landa – tur den nomber di solidaridad y speransa.
Como patrocinador principal di e evento, Aruba Bank ta orguyoso di a contribui AWG 50,000 na Koningin Wilhelmina Kankerfonds Aruba (KWKF), un fundacion dedica na duna sosten crucial pa individuonan y famianan afecta pa cancer riba nos isla.
KWKF ta ofrece asistencia financiero, emocional y medico pa esnan cu tin necesidad, y Ride for the Roses ta un oportunidad balioso pa yuda den esaki.
“Ta un honor pa nos yuda Koningin Wilhelmina Kankerfonds, y nos ta hopi contento di mira cu e comunidad a uni cu tanto entusiasmo,” Sra. Tamara Waldron, Regional Manager Marketing y Branding pa Aruba Bank y Orco Bank ta comenta.
Un danki na tur e participantenan, boluntarionan y organisadornan cu a yuda haci Ride for the Roses Aruba 2024 un exito significativo.
Ademas di Aruba Bank, e evento tabatin e sosten di Amsterdam Manor Beach Resort, Tri-Bike Aruba, y Super Food, cu nan contribucion a yuda reuni nos comunidad pa un dia di proposito, accion y union.
