TEAMARU ta cla pa ceremonia di inauguracion di IV Weganan Suramericano di Hubentud, Xia Rodriguez y Ocean van Loon ta e atletanan abanderado pa Panama2026

Manera costumber na tur Weganan den e Ciclo Olimpico, ta inicia cada evento cu un Ceremonia di Inauguracion. Aki tur delegacion cu ta participa ta presenta nan mes dilanto e pueblo di e pais sede y ta duna inicio na e competencianan. Cada delegacion ta wordo lidera atraves di e abanderadonan, unda ta scoge un atletana masculino y un femenino pa carga e bandera di e pais.

         

Den e caso di TEAMARU, e delegacion lo wordo representa door di Atletanan Xia Rodriguez y Ocean van Loon, cu ta encabesa e delegacion di Aruba durante e Ceremonia di Inauguracion. Sigur un momento bunita y yen di orguyo pa hisa e bandera di nos dushi isla dilanti un publico grandi. Comite Olimpico Arubano (COA) ta felicita e atletanan cu e oportunidad aki.