Su mahestad Rey Willem-Alexander y Prinses Amalia a sera conoci cu e Academia di futbol di Arubaanse Voetbal Bond – AVB

Kizas un bishita inespera pero bale la pena awe diamars ora cu e federacion di futbol Arubano, AVB a haya bishita di su mahestad Rey Willem Alexander y su altesa Prinses Amalia den stadion di Frans Figaroa na Noord. E famia di Cas Real acompana pa su Excelencia Gobernador, Sr. Alfonso Boekhoudt a ser ricibi pa e presidente di AVB, Sr. Randolf Lacle y pa varios hungadornan di futbol categoria infantil di e clubnan den e districto di Noord. E recepcion tabata simplemente unico unda cu Rey Willem Alexander y Prinses Amalia a saluda nos muchanan bou grito y aplouso cu e bandera di Aruba y Hulanda den nan man.

Despues Rey Willem Alexander y Prinses Amalia a sera conoci cu e Academia di futbol di AVB unda a haya un amplio splicacion di e trabou y plannan di e academia pa cu e futbol di Aruba den su totalidad. No por tabata falta e momento di potret cu tanto su mahestad Rey Willem Alexander y su atlesa Prinses Amalia cu e hungadornan a encanta un mundo.

Ta bon pa bisa aserca cu ambos tribuna tabata yena cu mirones cu a bini y saluda e famia di Cas Real.