Pluma a spart Lekker asina den Domino!

Shonnan, siman pasa diabierna 8 di december, e unico y mundialmente famoso Domino Square Garden a keda c’un capa diki diki di pluma, despues cu e conocido trabuconan di domino, esta Biba Lekker DT bou guia di captain Trimon, a ranca de laatste un pluma for di e ekipo nobis nobis titula Pluma Gang DT!
Esnan cu alergia pa pluma a keda scupi, tosa, nister, y grawata so di tanto pluma cu
tabata circula rond.

Anto cos a cuminsa fuerte prome cu e famoso halftime di Domino Square Garden, e
unico halftime na mundo caminda un y tur ta haya snacks completamente gratis! Pluma Gang a bati hala sali cu forsa y den no-time a bay dilanti cu 6-2.

No mucho rato despues, Pluma Gang ta avansa sigui dilanti cu 7-4, pero kico a bay fout precies, si tahala di manteca Pluma Gang a uza, no ta precies conoci, pero manera un fli sin rabo e
gang cu pluma a cuminsa perde haltura. Biba Lekker ta drenta halftime cu score
convenciente di 11-8.
Despues di a smaak boca, e bataya a sigui, pero ni kico e gang cu pluma a purba, ya
captain Trimon tin e timon dje barco duro wanta caba rumbo pa Puerto Victoria. Sin bira
wak atras, Trimon ta sigui guia su ekipo te na un triunfo aplastante di 21-14! Pues si
biaha pasa Pluma Gang a sa di demostra di ta “hoor erbij”, den e liga di Biba Lekker si
nan a siña canta een toontje lager manera puyito …

Shonnan, keda pendiente pasobra otro aña nan lo ta bek duro.