Federacion di Taekwondo ta splica nan plan tecnico pa aña 2025

Cu bista riba participacion na diferente evento y e weganan ASU2025, Federacion di Taekwondo ta splica nan plan tecnico pa aña 2025.

Durante un reunion cu presidente di Aruba Taekwondo Bond (ARTBO) y entrenador Nacional Teofilo Rodriguez, miembronan di Direccion di Deporte a combersa y delibera riba e situacion actual y e plan di entrenamento pa cu e atletanan di Taekwondo. E enfasis di e programacion pa e aña aki ta e clasificacion y participacion na e weganan Panamericano Junior “ASU2025” cu lo tuma luga augustus benidero na Asuncion-Paraguay. Pa e evento aki, atleta Maelynn Fradl ta den pleno proceso di clasificacion, unda cu e ta den campo di entrenamento na Mexico den preparacion pa e ultimo clasificatorio otro luna.

Banda di esaki a papia riba e desaroyo di e atletanan youth/junior, unda tin varios lo bay participa un evento di “cadet” pa asina sigi traha riba nan nivel como atleta di Teakwondo. COA ta desea tur atleta y e federacion hopi exito cu nan procesonan deportivo.