Ex-Big Leaguer, Eugene Kingsale un bes mas a participa na e Clinica di baseball WCBF na Matsue, Japon.

Ya un tradicion pa nos ex-pelotero profesional, Eugene Kingsale cu pa varios aña caba ta participa como instructor na e e WCBF cu ta tuma luga na Matsue, Japan unda tin varios instructor di e Clinica Mundial di baseball cu ta envolvi e dos homerun king nan y legendario ex basebolistanan profesional, Mr Sadaharu Oh y Mr Hank Aaron. 

Casi tur aña peloteronan di alrededor di diezinco  pais rond mundo ta bini hunto pa siña e wega di baseball pero e mas importante trece amistad rond mundo y pa comparti momentonan “ones in a life time” y cu no tur ora bo ta haya e oportunidad aki.

Nos yega di bisa esaki caba den pasado, Sir Eugene Kingsale ta un berdadero Embahador di Aruba den exterior. Su tantisimo añanan como pelotero profesional den baseball liga grandi a pone cu awe e ta un persona respeta unda oportunidadnan unico ta presenta pa yuda desaroya y sera conoci cu e deporte aki manera ta e caso na Japon. Eugene tambe ta masha envolvi cu e seleccionnan hubenil di baseball di Hulanda. Actualmente Eugene tin algun aña caba ta biba na Republica Dominicana unda e ta trahando den e parti desaroyo como miembro di e organisacion di MLB, Texas Rangers.

Pabien Eugene Kingsale y sigui cu e bon trabou cubo ta bin ta haci pa hopi anja caba como un big leaguer cu hopi conocimento riba e materia di baseball.