Conoce #TEAMARU su abanderadonan pa e Weganan Panamericano Junior 2025

Durante e ceremonia di apertura di e Weganan ASU2025 cu lo tuma luga den 10 dia na Asuncion-Paraguay, tur 41 pais participante lo desfila nan delegacion cual ta lidera door di e abanderadonan. Ta un atleta abanderado kiermeen cu lo lidera e grupo durante e ceremonia di apertura na e weganan, ademas di e prome cara cu lo sali durante apertura pa nos pais, cargando e orguyo di ful Aruba. Durante tur wega multideportivo den e ciclo Olimpico, ta nomina 2 abanderado, un di cada genero den cuadro di igualdad di participacion.

       

Pa e weganan ASU2025 e honor ta na Maelynn Fradl di Taekwondo y Inald Fernandes Perna di Natacion pa carga nos bandera. Ambos atleta a destaca durante e ultimo aña den nan deporte y awor lo ta e cara di e delegacion di #TEAMARU.

     

#TEAMARU lo tin 13 atleta en total, cu lo participa den 7 diferente disciplina deportivo:
Vela iQFoil : Kaj Rozeboom y Zara Rozenoom
Natacion: Chloe Farro, Avi Tromp, Inald Fernandes Perna, Braynsly Dirksz, Ocean van Loon
Natacion Artistico: Xiana Hoo, Kendra Siman
Natacion “Open Water”: Britta Schwengle
Taekwondo Kyorugi: Maelynn Fradl
Atletismo: Asher Patel (1500m)
Triatlon: Rebecca Jansen

Desde awo caba exito na nos atletanan cu ta den nan preparacionnan final.