Centerville Pie Warriors a haci entrega di un donacion na Stichting Imeldahof y Stichting Casa Cuna Progreso

Recientemente e ekipo di softbol Liga 50+, Centerville Pie Warriors atrabes di nan fundacion a organisa un rifa unda parti di e placa tabata destina pa dos instancia cu ta traha cu mucha na Aruba. Unanimamente a vota pa Casa Cuna Progreso y Imeldahof bira e dos instancianan cu lo wordo ayuda den Centerville Pie Warriors nan prome salida pa loke ta otorga donacion. Awe diamars, algun miembro di Centerville Pie Warriors den forma simbolico a haci entrega di e donacion na prome representantenan di Casa Cuna Progreso, sra. Jessica Canhigh y sra. Texiana Krozendijk. Tambe a otorga na representantenan di Imeldahof, sra. Jennyree Bovea y sra. Melissa Robert e check simbolico di 1000,-.

Centerville Pie Warriors ta praktika e deporte softbol den liga veterano. Apenas nan ta existi un anja y nan miembronan ta masha contento cu atrabes di e fundacion, nan por duna bek na nos comunidad di Aruba, specialmente na nos muchanan. Esaki ta e prome donacion cu e di Centerville Pie Warriors ta haci y sigur no lo ta e ultimo.

Ken ta Centerville Pie Warriors?
Centerville Pie Warriors ta un ekipo di softbol veterano cu ta milita den e Liga di softbol 50+. Na 2023 a lanta e ekipo cu ta wordo maneha pa Chuck Abdou y Freddy Donata. Pero e nomber di e patrosinador di e ekipo esta Centerville Pie ta funda na 2009 pa e grupo Centerville Pie Company cual donjonan ta dos hende muher cu tin fabrica di bolo(pie) na e ciudad di Cape Cod, Massachusetts(US). Na Merca, e compania ta suministra cahanan di bolo pa supermercadonan y consumidornan di comercio electronico den henter e pais. Centerville Pie ta para pa Calidad, Dignidad, Respect y Contribucion. Aki na Aruba e ekipo di Centerville Pie Warriors lo kier ta un digno representante di nan patrosinador.