Arubaanse Voetbal Bond-AVB por mira tras di un temporada 2023-2024 exitoso cu un total di 16 final disputa na nivel local

E temporada di futbol di e federacion di futbol Arubano, AVB a surpasa tur expectativa. Un total di 16 final a wordo hunga den tur e categorianan di edad, esaki sin conta e mas chikitionan esta U5 y U7 cu mas cu claro ta hunga pa diberticion y sinja un poco di loke deporte rey ta ofrece na nan. E categoria aki a hunga un campeonato di casi 5 a 6 luna den su totalidad unda tur diasabra mainta terenonan di Frans Figaroa na Noord como tambe Buchi Panama na Yara tabata ocupa pa nos muchanan. Tur e clubnan di futbol y nan miembronan cu tur mainta ta lanta y percura pa tur cos ta up to date pa asina entrenamento y weganan  di futbol por continua. Tambe no por lubida e seleccionnan nacional masculino y femenino cu a hunga un tremendo torneo di clasificacion y a laga Aruba henter disfruta di un bon futbol cu nos tabata anhela pe pa mas di 12 anja cu nos por a mira atrobe un wega di seleccion na Aruba esaki den un stadion Guillermo Prospero Trinidad na Dakota full renoba. Mas grandi so esaki por bira ora e stadion keda completamente cla.

Biniendo bek na e Campeonato di futbol local 2023 – 2024, nos por a mira cu a wordo hunga final den Liga Oro y Liga Plata como tambe Damas Youth U17 y Damas Open. Si nos pone e campeonan y runner-up nan riba un rij nos ta haya;

Categoria U9

• Oro: RCA 1 – 2^nd Nacional 1
• Plata: Bubali – 2^nd Brazil Jrs

Categoria U11

• Oro: Nacional – 2^nd Dakota
• Plata: RCA 2 – 2^nd RCA 3

Categoria U13

• Oro: RCA 1 – 2^nd Britannia 1
• Plata: Britannia 2 – 2^nd Riverplate

Categoria U15

• Oro: Britannia 1 – 2^nd La Fama 1
• Plata: Estrella – 2^nd Riverplate

Categoria U17

• Oro: Britannia – 2^nd La Fama
• Plata: Estrella – 2^nd Bubali

Categoria Damas

• Youth: RCA – 2^nd Estrella
• Open: Britannia – 2^nd RCA

Categoria Junioren

• Dakota 1 – 2^nd Britannia

Categoria Honor

• Plata: La Fama – 2^nd SC United

Categoria Honor

• Oro: Britannia – 2^nd Dakota

Categoria Uno

• Sporting – 2^nd Racing Club Savaneta

Si nos resumi tur e categorianan di edad, e ekipo di Britannia a disputa mas final cu 7 final hunga, sigui pa RCA cu 6 final. E ekiponan di Dakota, La Fama y Estrella a hunga 3 final mientras Nacional, Bubali y Riverplate a hunga 2 final cada uno. Pa loke ta titulo campeonil logra, Britannia ta lidera cu 5 di campeon sigui pa RCA cu 4 titulo maximo.

Nos di 297sports kier a yama un pabien na prome e federacion di futbol AVB y tur su trahadonan cu nan exitoso temporada di futbol 2023- 2024. Un pabien na tur e organisacionnan di futbol cu tur dia boluntariamente ta traha na progreso y desaroyo di nos hoben futbolistanan, no solamente pa cu e deporte rey pero tambe den nan desaroyo como personanan ehemplar den nos comunidad. Na e mayornan, coach, trainer, leider(ster), team manager, masahista, staf tecnico, personal Prome Auxilio, fanaticada y sigur tambe e cuerpo di referee, match commissioner, boluntarionan di AVB, seguridad, Dj, personal FFD y media engeneral un danki grandi pa haci futbol un deporte mas grandi y exitoso na Aruba. Nos tin sigur cu hopi ta anhela pa e temporada di futbol 2024 – 2025 cuminsa.