Aruba Sport Unie a inaugura Centro Deportivo Libertador Betico Croes

Algun rato pasa, Aruba Sport Unie, ASU a inaugura Centro Deportivo Libertador Betico Croes completamente renoba. Desde pandemia Centro Deportivo Betico Croes conoci tambe como Sporthal no a wordo usa mas pa deporte y tabata cla pa un facelift nobo. Awe diamars 17 di september e dia e yega pa laga e publico y e deporte drenta e acomodacion deportivo atrobe, e abiaha aki den forma oficial. Presente nos por a mira e directiva di ASU cu presidente Soriada Boekhoudt, tambe Minister di Ensenansa y Deporte, Sr. Endy Croes, e trahadornan di ASU y e demas invitadonan presente. 

Prome Minister Croes a haya e honor pa cende e lus di e Centro Deportivo ya cu por admira esaki for di leu. Despues a bay over na corta e cinta pa asina oficialmente inaugura Centro Deportivo Libertador Betico Croes. 

Por ultimo, Minister Croes y presidente di ASU, Soraida Boekhoudt a haci e sake di bala den un wega di exhibicion entre e seleccionnan di volleyball di Aruba. Asina tambe a inagura e cancha di Centro Deportivo cu por cierto a keda masha bunita mes. 

Un palabra di pabien na ASU y tur e deportenan indoor cu sin duda lo disfruta di un cancha nobis nobis.