Annelaine Jacobs ta comparti su alegria mirando e logronan di Aruba

Ex-Campeon Panamericano Hubenil di Dammen y awor docente di Movecion y Salud na Colegio Conrado Coronel, Annelaine Jacobs ta comparti su alegria mirando e logronan di Aruba den e Weganan Interinsular Escolar na Boneiro.

Na anja 2008, Annelaine a bira campeon hubenil di e continente America na Surnam, 10 anja despues Annelaine ta logra dos lugar den e Panamericano grandi di dammen na Corsow. Awor como docente y guiando e alumnonan di scol, Annelaine ta logra un titulo interinsular escolar unda e hoben Xyon Jacobs ta logra e titulo maximo den dammen entre alumnonan di Aruba, Corsow, Boneiro y Saba.

Mas cu claro Annelaine tabata super contento cu e triunfo aki como docente di scol. Su experticio y experiencia como experto den dammen y schaken e ta comparti esakinan cu e demas alumnonan.

Annelaine a scirbi textualmente riba su plataforma di media social:

Despues di 7 aña, Competencia Escolar Interinsular ta on bek y e deportenan dammen y schaken tin e honor pa e re-apertura.

Mi mes persona a competi den Competencia Escolar Interinsular di dammen, schaken, atletiek y zwemmen pa hopi aña.

E biaha aki mi a forma parti di e delegacion di Aruba como entrenadora. Mi ta super orguyoso di cada mucha cu a participa, tur a haci un tremendo trabou. Mi ta contento cu mi por a yuda nos muchanan cu e conocemento cu mi tin pa asina nan mehora pa por a duna un bataya fuerte contra Curaçao y Bonaire.

Xyon Jacobs a logra prome luga den mucha homber overall. Tanchi ta orguyoso di bo Xyon!

Jaylee Krozendijk a logra di dos luga den mucha muhe overall.

Elion Istatia a logra di tres luga den mucha homber overall.

Muchanan di Colegio Conrado Coronel.

Juffrouw ta orguyoso di boso.

Un danki na IBiSA pa a haci esaki posibel pa nos muchanan y danki pa engrandece deporte escolar na Aruba.

Pabien Annnelaine Jacobs