Cu participacion di Aruba, Estados Unidos, Perú, Venezuela y Colombia A y B e torneo internacional di Kickingball a inicia na e ciudad di Cartagena, Colombia. Esaki a bira a prome torneo organisa den e deporte aki. Sigur un bunita iniciativa pa organisa un torneo internacional den un deporte relativamente nobo pero cu rapidamente a bira super popular. Na Aruba esaki no ta un excepcion mirando cu pa mas cu 1 anja y pico, kickingball a bira e deporte revelacion na Aruba unda homber y muher hunto ta participa y duna bataya. Un wega moderno unda bo ta skop e bala y hunga cu reglanan di softball. Mester bisa cu e weganan tur ta tumando lugar den e stadion Argemiro Bermúdez de Chiquinquirá na Cartagena.
Sinembargo Aruba ya a cay afor den e torneo mirando cu nos seleccion ta relativamente nobo y a enfrenta paisnan cu ya caba tin un tempo largo den e deporte aki. No obstante di e resultado, nos seleccion a tuma esaki como un bon base pa traha mas duro pa futuro torneonan na caminda. E parti defensivo di Aruba tabata tremendo mientras den e parti ofensivo nos lo mester traha mas duro. E staf di coach sigur ta satisfecho pero sa tambe cu tin hopi trabou pa haci ainda. E seleccion di Aruba kier a gradici un y tur pa e sosten pa cu nan biahe pa Cartagena, Colombia.
